Nagtipon ang mga pamilya ng mga biktima ng extrajudicial killings o EJK para sa isang misa noong Oktubre 29 upang alalahanin ang kanilang mga yumaong mahal sa buhay at ipagdasal ang katarungan at paghilom bago ang Undas.
Pinangunahan ni Father Flaviano “Flavie” Villanueva, na hayagang tumututol sa madugong kampanya kontra ilegal na droga, ang misa sa Diocesan Shrine of Jesus the Divine Word–Christ the King Mission Seminary. Ayon kay Villanueva, mas maagang idinaos ang misa upang bigyang-daan ang mga abalang iskedyul ng mga pamilya at ng Simbahan sa panahon ng Undas.
Binigyang-diin ni Villanueva na gaya ng ibang Pilipino, binibisita rin ng mga pamilya ng mga biktima ang puntod ng kanilang mga mahal sa buhay at patuloy na isinasalaysay ang kanilang mga kuwento. Inalala rin sa misa ang mga nasawi sa kampanya kontra ilegal na droga noong administrasyon ni dating Pangulong Rodrigo Duterte.
Matapos ang misa, nag-alay ng mga bulaklak ang mga pamilya sa isang pansamantalang altar na may mga larawan, pangalan, petsa ng pagkamatay at huling mga salita ng kanilang mga mahal sa buhay. Ipinagdiriwang ang Undas tuwing Nobyembre 1, All Saints’ Day, at Nobyembre 2, All Souls’ Day.
