Kinumpirma ni Lead Prosecutor at Batangas Rep. Gerville Luistro na may records ang Anti-Money Laundering Council (AMLC) tungkol sa mga remittance na ipinadala sa Cale88 Foods Corp. mula China at iba pang bansa.
Ayon sa mambabatas bahagi ito ng mga dokumentong isinumite ng AMLC sa Senate impeachment court bilang ebidensya sa Article II ng impeachment case laban kay Vice President Sara Duterte.
Tumanggi si Luistro na ibunyag ang halaga, mga nagpadala, petsa at iba pang bansang pinagmulan ng remittances dahil nakabinbin pa ang pormal na presentasyon ng AMLC sa impeachment court.
Tinanong din si Luistro kung may kaugnayan ang mga remittance kay businessman Jaime T. Cruz o sa mga usaping dapat sana ay tatalakayin ni dating Sen. Antonio “Sonny” Trillanes IV.
Sinabi niyang hindi pa matutukoy kung may ganitong koneksyon hanggang sa pagharap ng AMLC sa korte.
Inaasahang haharap sa impeachment court si AMLC Secretariat Executive Director Ronel Buenaventura sa Oktubre 5 upang ilahad ang mga nasabing financial records.
