Inanunsyo ng Department of Social Welfare and Development (DSWD) na agad nitong mapapadali ang pamamahagi ng P500 na tulong sa 7.5 milyong Pilipino, kasunod ng pagpapalabas ng karagdagang pondo para sa Targeted Cash Transfer (TCT) program nito.
Ito ay ayon sa Department of Budget and Management (DBM) na pag-apruba sa Special Allotment Release Order sa halagang P7.6 bilyon, na gagamitin ng DSWD sa pagpapatuloy ng nasabing programa.
Nagpahayag ng pasasalamat si DSWD Secretary Rex Gatchalian sa Targeted Cash Transfer Inter-Agency Committee, na kinabibilangan ng DSWD, DBM, Department of Finance, at National Economic and Development Authority, sa pagbibigay-priyoridad ng budget allocation para sa patuloy na pagpapatupad ng programa.
Ayon kay DSWD Assistant Secretary at Spokesperson Romel M. Lopez, isa pang batch ng cash transfer ang ipapamahagi sa mga target na Filipino household ng programa.
Nauna nang ipinag-utos ni Pangulong Ferdinand R. Marcos Jr. na ipagpatuloy ang programa ng Targeted Cash Transfer upang matulungan ang mga mahihina at nangangailangang mamamayan na higit na nangangailangan.
Ang mga benepisyaryo ng Targeted Cash Transfer program ay ang mga pinaka-apektado sa patuloy na pagtaas ng presyo ng mga pangunahing bilihin bunga ng mataas na inflation na nararanasan ng ating bansa.
