Isang 53-anyos na Pilipinong turista ang pumanaw habang nakasakay sa “Frozen Ever After” attraction sa Hong Kong Disneyland, ayon sa ulat ng Department of Foreign Affairs (DFA) noong Sabado.
Batay sa ulat ng Philippine News Agency (PNA), nawalan ng malay at bumagsak ang biktima habang nasa loob ng nasabing ride bandang alas-10:00 ng umaga noong Biyernes.
Idineklarang patay ito makalipas ang isa’t kalahating oras, bandang 11:30 ng umaga.
Kinumpirma naman ng Philippine Consulate General sa Hong Kong ang insidente matapos makipag-ugnayan sa Lantau Police Headquarters.
Ayon sa DFA, agad nilang kinontak ang pamilya ng nasawi upang magpahatid ng pakikiramay at tumulong sa pagproseso ng repatriation ng mga labi.
Bilang tugon, pansamantalang isinara ng Disneyland ang Frozen Ever After ride mula Agosto 31 hanggang Setyembre 19, dahil umano sa “operational adjustments”.
