LEGAZPI CITY- Arestado ang apat na katao habang dalawang suspek ang nakatakas sa isinagawang anti-drug operation ng PNP sa isang drug den sa Barangay Sto. Cristo, Tabaco City, Albay.
Ayon sa Tabaco City Police Station, nagsilbi ang kanilang mga tauhan ng search warrant sa tahanan ng drug personality na si Fernando Buena alyas Pando, 64-anyos.
Subalit pagpasok ng PNP, dito na nadiskubreng isa pala itong drug den at nasa loob ang lima pang mga suspek.
Agad na hinuli at pinusasan ng mga otoridad si Buena at mga bumibisita sa lugar na sina Jeffrey Placido, Marcelino Arabia, at isang menor de edad na lalaki.
Nakatakas naman at pinaghahanap na ng mga otoridad ang dalawang iba pa na hindi parin tukoy ang pagkakakilanlan hanggang ngayon.
Samantala narekober sa lugar ang isang transparent bag na may lamang hinihinalang shabu, anim na sachet ng droga, apat na improvised burners at iba pang mga drug paraphernalia.
Sa ngayon nakakulong na sina Buena, Placido at Arabia na nahaharap sa kasong paglabag sa RA 9165 o ang Comprehensive Dangerous Drugs Act of 2002.
