Sa pamamagitan ng botohan, 13 pabor kumpara sa anim na hindi nakibahagi at isa ang tumutol, binigo ng Senate impeachment court ang mosyon ni Senator-Judge Alan Peter Cayetano na ipagpaliban ang pagpapasya sa gagamiting voting threshold para sa hatol kay Vice President Sara Duterte.
Binatikos ni Cayetano ang kapangyarihan at timing ng impeachment court, habang iginiit ni Senator-Judge Pia Cayetano na ang Korte Suprema at hindi ang Senado ang may poder sa usapin, kaya ipinahayag ng dalawa na hindi sila lalahok sa botohan.
Maging si Senator-Judge Imee Marcos ay naglabas ng kanyang pangamba at inihayag na hindi niya inasahang ipagtatanggol ang Konstitusyon laban sa pamana ng kanyang ama.
Naging emosyonal din ang pagdinig nang lumuha si Senator-Judge Camille Villar, na sinuportahan ng kanyang kapatid na si Senator-Judge Mark Villar, hinggil sa mga patama sa mga hindi nakadadalong mambabatas na may kinahaharap na kaso, na sinundan naman ni Senator-Judge Bong Go sa pagsabing “Baka mamaya wala na akong kasama rito” nang paboran nito ang pag-antala sa usapin.
Sa kabila ng mga serye ng emosyonal na apela at legal na pagprotesta mula sa kampo ng mga kaalyado ng Bise Presidente, pormal pa ring itutuloy ng mayorya ng impeachment court ang opisyal na pagtatakda sa alituntunin ng botohan.
Hiwalay namang nagbigay ng kanyang suhestiyon si Senator-Judge Vicente Sotto III at mariing iginiit na walang tiyak na numerong “16” sa Saligang Batas kundi ang pangkalahatang alituntunin lamang ng two-thirds na taliwas sa pagtingin ng iba nilang kasamahan.
