KORONADAL CITY – Tinutugis na ng mga otoridad ang suspek sa nangyaring pananaga sa bahagi ng Sitio T’Bayong, Brgy. Lamfugon, Lake Sebu, South Cotabato na ikinasawi ng isang katao at ikinasugat ng isa pa.
Kinilala ang nasawing biktima na si Roland Sulan Salaway, 34 at ang kapatid nitong si Tuyong Sulan Salaway 45 at kapwa residente ng naturang lugar.
Batay sa imbestigasyon ng Lake Sebu PNP, nag-iinuman umano ang mga biktima at ang suspek na si Eric Sulan Salaway, na kapatid rin ng mga biktima, kung saan nagkaroon ng mainit na pagtatalo ang mga ito.
Kumuha naman ng itak si Eric at pinagtataga ang mga biktima kung saan lubhang napuruhan si Roland.
Kaagad isinugod sa South Cotabato Provincial Hospital ang magkapatid ngunit idineklarang dead on arrival si Roland, habang nagpapagaling naman si Tuyong.
Sa ngayon ay nagsasagawa na ng hot pursuit operation ang Lake Sebu PNP matapos ginawa ang naturang krimen.
