Nagpahiwatig ang Trillion Peso March Movement na posibleng masundan pa ang kanilang malawakang kilos-protesta kung mananatiling mabagal ang imbestigasyon sa maanomalyang flood control projects.
Sinabi ni Francis “Kiko” Aquino Dee, tagapagsalita ng grupo, hindi titigil ang kanilang panig hangga’t walang malinaw na resulta ang mga imbestigasyon sa tinaguriang pinaka malaking korapsyon sa pondo ng bansa.
Nabatid na nasa 120,000 katao ang lumahok sa Trillion Peso March nitong Nobyembre 30 sa People Power Monument, Mendiola, at Rizal Park.
Habang ibang bilang pa ang naitala sa mga lalawigan.
Suportado kasi ito ng 86 dioceses ng Simbahang Katoliko na naglabas ng panawagan laban sa korapsyon.
Batay sa ulat ng mga mambabatas, kabilang sa mga anomalyang nadiskubre ang proyektong flood control sa Bulacan na nagkakahalaga ng P55 milyon ngunit walang actual na istrukturang naitayo.
Ayon naman sa NDRRMC, libu-libong pamilya ang naapektuhan ng pagbaha ngayong taon na nagdulot ng 31 pagkasawi at higit 6.2 milyong kataong naapektuhan.
Nanawagan ang grupo na pabilisin ang proseso ng pagpapanagot sa mga tiwaling opisyal at kontraktor upang maipakita na seryoso ang pamahalaan sa laban kontra korapsyon.
