Nilikha ni Pangulong Rodrigo Duterte ang isang inter-agency task force para tugunan ang problema sa kagutuman sa bansa, gayundin ang pagtatag ng National Food Policy para makamit ang target na “zero hunger” sa 2030.
Batay sa Executive Order No. 101 na nilagdaan ni Pangulong Duterte noong Enero 10, minamando nito ang pagbuo ng Inter-Agency Task Force on Zero Hunger na pamumunuan ng Cabinet Secretary kasama ang Social Welfare Secretary.
Kabilang sa mga miyembro ng task force ang mga kalihim ng Agriculture, Agrarian Reform, Budget and Management, Education, Environment and Natural Resources, Health, Labor and Employment, Interior and Local Government, Trade and Industry, Science and Technology at Communications departments.
Kasama rin dito ang director general ng National Economic and Development Authority (NEDA) at chairperson ng Commission on Higher Education (CHED).
Ilan sa mandato ng task force ang pagbuo ng National Food Policy na siyang mag-outline sa mga prayoridad at roadmap ng gobyerno sa pagkamit ng “zero hunger.”
“The National Food Policy should include initiatives for ending hunger, achieving food security, improving nutrition, and promoting sustainable agriculture,” ani Pangulong Duterte.
