Dumaan lang umano sa bakod at hindi sa gate ang dalawang menor de edad na sangkot sa pamamaril sa San Jose National High School sa Tacloban City.
Ayon kay DepEd Undersecretary for Operations Malcolm Garma, mahalagang magdagdag ng seguridad sa mga paaralan matapos ang trahedya.
Makaraan ang insidente, muling binigyang-diin ni Garma na may inilabas na silang patakaran para higpitan ang security measures sa mga paaralan, kasunod ng pamamaril sa Nueva Ecija noong nakaraang taon.
Kabilang sa mga pinag-aaralan ngayon ng DepEd ang pagpapataas ng bakod ng mga paaralan at ang paglalagay ng sapat na metal detectors upang matiyak na hindi makakapasok ang mga armas sa loob ng mga eskuwelahan.
Ang hakbang na ito ay bahagi ng mas malawak na pagtutok ng DepEd sa kaligtasan ng mga mag-aaral at kawani, kasabay ng panawagan sa publiko na manatiling mapagmatyag at makiisa sa pagpapanatili ng kapayapaan sa mga institusyong pang-edukasyon.
