Pirmado na ni US President Joe Biden ang panukalang batas may kaugnayan sa anti-Asian hate crimes na lumala pa sa gitna ng COVID-19 pandemic sa Amerika.
Sa ilalim ng bagong batas, inaatasan ang US Department of Justice na sumentro sa prosecution ng violent crimes laban sa Asian Americans at Pacific Islanders kabilang na ang COVID-19 related hate crimes.
Todo papuri naman ang ibinigay ni Biden sa mga Democrats at Republicans sa pagpapatibay ng mahalagang batas na ito.
“Silence is complicity and we cannot be complicit. We have to speak out. We have to act,” ani Biden sa harap ng ilang mambabatas sa signing ceremony sa White House. “That’s what you’ve done. And I can’t thank you enough. I’m proud today.”
Unang inaprubahan sa US Senate ang anti-Asian hate crimes bill na nakakuha ng 94-1 votes at 364-62 naman sa House of Representatives.
Kung maaalala ilang aktibista at pulis ang naniniwala na ang isyu sa anti-Asian sentiments ay naging ugat noon si dating Presidente Donald Trump matapos na sisihin ang China, kung saan gumamit pa siya ng mga salita na “China virus,” “kung flu,” at iba pa.
Ang panukalang batas ay pangunahing inisponsor nina Democratic Senator Mazie Hirono at Democratic Representative Grace Meng.
Kabilang sa iniaatas ng bagong batas ang pagbalakas ng polisiya para maging madali ang pag-report ng mga state at local law enforcement agencies na may kinalaman sa mga hate crimes, palawakin ang public education campaigns, at maglabas ng guidance laban sa mga discriminatory language na tumutukoy sa pandemic.
Magtatalaga rin ang US Justice Department ng isang opisyal na siyang pangunahing mamahamala sa kampanyang ito pati ang gagamiting hotlines sa reporting.
“Incidents of hate against Asian Americans have seen a shocking spike over the last year. It’s wrong — and it’s un-American,” pahayag pa ni President Biden. “To all those who are hurting: we see you and we are committed to stopping the hatred and bias.”
Dumalo rin naman sa seremonyas sa White House at nagsalita si Vice President Kamala Harris, ang first woman, first African American at unang opisyal na may Asian descent sa pinakamataas na puwesto sa Amerika.
“To the members of our United States Congress on both sides of the aisle who helped pass the COVID-19 Hate Crimes Act, thank you,” ani Harris. “Because of you, history will remember this day and this moment when our nation took action to combat hate.”
