Pinasadahan ngayon ng Philippine National Police (PNP) ang mga mapagsamantalang negosyante kasunod ng matagumpay na pagkakaaresto at pagsasampa ng pitong kaso laban sa mga sangkot sa hoarding at iba pang ilegal na aktibidad kaugnay ng petrolyo.
Ang hakbang na ito ay bunsod ng serye ng pagtaas ng presyo ng langis na pinalala ng umiigting na tensyon sa Middle East.
Bilang patunay sa mas mahigpit na kampanya, kinumpirma ng pulisya ang pag-aresto sa isang 43-anyos na may-ari ng establisyemento sa pamamagitan ng isang entrapment operation sa Ligao City, Albay noong ika-26 ng Marso.
Nasabat mula sa suspek ang humigit-kumulang P2 milyong halaga ng mga kontrabando. Kabilang dito ang isang fuel tanker truck, iba’t ibang storage containers, nasa 1,000 litro ng gasolina, pati na rin ang marked money na ginamit sa operasyon.
Nahaharap ang naarestong suspek sa paglabag sa Batas Pambansa Bilang 33, na mahigpit na nagpaparusa sa ilegal na pangangalakal at distribusyon ng mga petroleum products.
Samantala, sa isang press briefing, iniulat ni PNP spokesperson Police Brigadier General Randulf Tuaño na bukod sa operasyon sa Albay, nakapagsampa na rin sila ng tatlong pormal na reklamo para sa hoarding sa Bicol Region, at isa sa Eastern Visayas.
Mayroon ding hiwalay na kaso ng profiteering o labis na pagpapatong ng presyo na isinampa laban sa mga indibidwal sa Eastern Visayas at Davao Region.
Bukod dito, nakapagtala rin ang mga awtoridad ng isang insidente ng trademark infringement sa Central Luzon, ayon kay Tuaño.
Patuloy ang babala ng PNP sa publiko at sa mga negosyante na huwag samantalahin ang krisis sa langis, dahil hindi mangingimi ang kapulisan na ipatupad ang batas laban sa mga lalabag.
