Pinakakasuhan ng plunder ni Anakalusugan party-list Rep. Mike Defensor ang mga opisyal ng PhilHealth hanggang sa regional level na sinasabing sangkot sa “mafia” scheme sa ahensya.
Sa pagpapatuloy ng pagdinig ng House joint panel hinggil sa mga anomaliya sa PhilHealth, tinukoy ni Defensor ang biglaang pagtaas ng bilang ng claims sa iba’t ibang sakit at medical procedures na binabayaran ng state health insurer.
Kinuwestiyon din nito ang mabilis na pagbayad ng PhilHealth sa claims ng ilang pribadong ospital, habang natatagalan naman iyong sa mga government hospitals.
Kumbensido si Defensor na ang mga aktibidad na ito ay maituturing na plunder, at dapat na kasuhan ang mga indibidwal na sangkot sa modus na ito.
Dapat aniyang mapasama sa mga makakasuhan ang iba pang mga kasabwat ng mga opisyal ng PhilHealth.
Nauna nang hiniling ni Defensor na itigil na ang case rate system dahil ilang bilyong piso ang nawawala sa pondo ng PhilHealth dahil dito.
