Inihayag ni Philippine Ambassador to the United States Jose Manuel “Babes” Romualdez na nais ni Pangulong Ferdinand “Bongbong” Marcos Jr. ang mas maraming aktibidad sa ekonomiya sa pagitan ng Pilipinas at US sa ilalim ng kanyang administrasyon.
Ayon kay Romualdez, nakipag-usap din siya kay Finance Secretary Benjamin Diokno tungkol sa usapin, lalo na sa pagkuha ng mas maraming pamumuhunan mula sa US.
Inilarawan ni Romualdez ang ugnayan sa pagitan ng Pilipinas at US bilang “very stable and strong” dahil malinaw na nais ng administrasyong Biden na makipagtulungan sa Marcos presidency.
Sa kanyang inaugural address noong Huwebes, binigyang-diin ni Marcos Jr ang kahalagahan ng pagpapalakas at pagpayaman ng mga relasyon sa iba pang mga estado.
Idinagdag pa rito na ang pagbabago ng ekonomiya ng mundo at ang post-pandemic recovery ay nakasalalay sa pakikipagtulungan sa ibang mga bansa.
Magugunitang, noong nakaraang buwan, nakipagpulong kay Marcos ang Deputy Secretary of State ng Estados Unidos na si Wendy Sherman at tinalakay kung paano palakasin ang alyansa ng Pilipinas at US kung saan tinalakay nila ang ekonomiya, karapatang pantao, at free Indo-Pacific region.
