Nadadagdagan pa ang bilang ng bakunahan kontra COVID-19 sa bansa ayon sa Department of Health (DOH).
Sa datos ng kagawaran, mula noong buwan ng Marso ay tumaas pa hanggang 200,000 ang bilang ng mga indibidwal na nababakunahan sa bansa mula noong buwan ng Marso.
Sinabi ni Health Undersecretary Maria Rosario Vergeire, sa ngayon ay hindi pa nakakamit ng lahat ng rehiyon sa Pilipinas ang kanilang 50 percent target population sa bakunahan naman ng booster shot.
Habang ang National Capital Region (NCR) naman aniya ang pinakamalapit nang maabot ang target na umaabot na sa 43 percent ng target population nito.
Bukod dito ay ibinalita rin ni Vergeire na inatasan din ni Pangulong Ferdinand “Bongbong” Marcos Jr. ang DOH na lalo pang paigtingin ang bakunahan ng booster shot sa bansa.
Ito ay dahil sa mga napapaulat na muling pagtaas ng mga kaso ng COVID-19 sa iba’t-ibang panig ng bansa at gayundin ang paghina naman ng immunity ng mga ating mga kababayan laban sa nasabing virus.
Ayon kay Vergeire, upang maisakatuparan ang utos na ito ng pangulo ay ilalapit nila sa mga komunidad ang mga bakunahan kabilang na ang pagsuyod sa malalayong lugar na mahirap maabot at ang pagsasagawa ng house-to-house vaccination para naman sa mga kababayan nating senior citizen.
Hihingi rin aniya sila ng tulong sa iba’t-ibang ahensya ng gobyerno tulad ng Department of Labor and Employment (DOLE), Department of Interior and Local Government (DILG), at marami pang iba.
Sa ngayon ay umaabot na sa 70.8 million na mga Pilipino ang nakatanggap na ng kumpletong bakuna laban sa nakamamatay na sakit, habang 15.2 million naman sa mga ito ang naturukan na ng booster shot batay sa pinakahuling datos na inilabas ng DOH.
