Tinapos na ng House Committee on Good Government and Public Accountability ang pagdinig ukol sa umano’y maling paggamit ng pondo ng Office of the Vice President at Department of Education.
Batay sa mosyon ni ABANG LINGKOD Party-list Representative Joseph Stephen Paduano ay idineklara nang “terminated” ang pagtalakay sa privilege speech ni Manila Representative Rolando Variano patungkol sa budget utilization ng OVP at DepEd.
Gayundin ang motu proprio inquiry sa manifestation ni Batangas Representative Gerville Luistro hinggil sa umano’y bigong pag-deliver ng mga computer ng DepEd.
Ayon kay Manila 3rd District Representative Joel Chua na siyang pinuno ng komite, sinabi nitong posibleng ilabas na nila ang committee report sa susunod na linggo kung saan magiging laman ang mga naungkat sa pagdinig ng Blue Ribbon Panel.
Mababatid na sa marathon hearings ng Good Government and Public Accountability Committee nabunyag ang umano’y mga kuwestyonableng acknowledgment receipts na ginamit ng OVP at DepEd kaugnay sa paggastos ng confidential funds na kalaunan ay isinama sa grounds for impeachment laban kay Vice President Sara Duterte.
Dito rin naisiwalat ang umano’y pamamahagi ni VP Sara ng envelope na naglalaman ng cash sa ilang opisyal ng DepEd.
