Pinangalanan din ni President-elect Ferdinand Marcos si dating Light Rail Transit Authority (LRTA) Deputy Administrator Cesar Chavez bilang Undersecretary-designate para sa Rails ng Department of Transportation (DOTr).
Si Chavez, na itinalaga ni Pangulong Rodrigo Duterte sa parehong puwesto noong 2017, ay naging instrumento sa pagtiyak ng pag-apruba ng NEDA Board para sa Metro Manila Subway, PNR Manila hanggang Calamba, PNR Manila hanggang Bicol, at ang Tagum-Davao-Digos Mindanao rail projects.
Pinarangalan din siya sa pangangasiwa sa interconnection ng LRT Line 1 sa Monumento hanggang MRT 3 sa North Edsa, kung saan tinitiyak ang tuluy-tuloy na paglalakbay para sa mga pasahero.
Bago magtrabaho sa sektor ng transportasyon, naging Assistant General Manager for Planning siya ng MMDA, Chairman ng National Youth Commission (NYC), at Youth sector Representative sa 9th Congress.
Samantala, si veteran journalist at Atty. Cheloy E. Garafil, ang napili ni President-elect Marcos na mamuno sa Land Transportation Franchising and Regulatory Board (LTFRB).
Si Atty. Garafil, ang kasalukuyang Service Director ng Committee on Rules of the House of Representatives, naging Prosecutor sa Department of Justice (DOJ) at State Solicitor sa Office of the Solicitor General (OSG).
Nagtrabaho siya bilang isang media practitioner nang mahigit isang dekada sa iba’t ibang organisasyon ng media tulad ng Philippine Daily Globe, Central News Agency, Associated Press, at Malaya.
Mayroon din siyang Master’s degree sa National Security Administration mula sa National Defense College at isang Philippine Air Force reservist na may ranggong Lieutenant-Colonel.
Nominado rin ni President-elect Marcos para sa kanyang transport cluster si Christopher “Chet” Pastrana, na magiging General Manager-designate ng Philippine Ports Authority (PPA).
Si Pastrana, isang matagumpay na negosyante sa larangan ng transportasyon, ay nagdadala ng mga dekada ng karanasan sa iba’t ibang aspeto ng aviation, logistik, at pampublikong sasakyang pandagat.
Nagtapos ng Bachelor of Science in Agricultural Business mula sa Unibersidad ng Pilipinas, Los Baños, noong 1987.
Kasalukuyan siyang Presidente at CEO ng CAPP Industries.
Si Pastrana din ang Chairman ng Archipelago Philippines Ferries Corp. (APFC), na nagpapatakbo ng FasCat ferry, ang pinakakilala at iginagalang na transport provider ng sektor.
