Ipinakilala na ni President-elect Joe Biden nitong araw ang kanyang napili bilang attorney general sa katauhan ni Judge Merrick Garland.
Sinabi ni Biden na si Garland, na matagal nang federal jurist, ay magsisilbi bilang impartial arbiter ng hustisya hindi lamang bilang “personal attorney” niya kundi ng taumbayan.
“You won’t work for me. You are not the president or the vice president’s lawyer. Your loyalty is not to me. It’s to the law. The Constitution. The people of this nation. To guarantee justice,” ani Biden kay Garland.
Si Garland ay kasalukuyang nagtatrabaho sa US Court of Appeals sa distrito ng Columbia Circuit.
Taong 2016 nang inomina siya ni President Barack Obama sa Supreme Court kasunod nang pagpanaw ni Justice Antonin Scalia, pero hinarang ng Senate Republicans ang kanyang nomination.
Bukod kay Garland, ipinakilala rin ni Biden sa event sa Wilmington sa Delaware ang tatlong iba pang nominees para sa matataas na posisyon sa Justice Department.
Para sa posisyon na deputy attorney general, pinili ni Biden si Lisa Monaco, isang dating homeland security adviser kay Obama.
Para sa posisyon na No. 3 official, napili ng president-elect si Vanita Gupta, ang siyang nanguna sa civil rights division ng Justice Department sa panahon ni Obama; at si Kristen Clarke, na isa namang civil rights lawyers, ang napili para sa posisyon na attorney general for civil rights.
