Muling iginiit ng mga mangingisda sa Zambales ang kanilang hinaing sa pagkawala ng malayang pangingisda sa Bajo de Masinloc o Scarborough Shoal.
Ayon kay Zambales Rep. Doris “Bing” Maniquiz, muling nabuhay ang kanilang pagkadismaya matapos lumabas sa impeachment trial ni Bise Presidente Sara Duterte ang ulat tungkol sa P319.33 milyong remittance na natanggap ng Cale88 Foods Corp., kumpanyang iniuugnay sa asawa nitong si Atty. Manases Carpio.
Sinabi ni Maniquiz na unti-unti nang tinanggap ng mga mangingisda ang paghahanap ng ibang pangisdaan dahil sa takot sa mga insidente ng pananakot ng mga barkong Tsino, kabilang ang paggamit ng water cannon.
Gayunman, dahil sa isyu ng remittance, muli nilang kinuwestiyon kung bakit nahihirapan ang mga Pilipino na makapasok at mangisda sa karagatang matagal na nilang pinagkukunan ng kabuhayan.
Ayon sa mambabatas, dati ay sagana sa isda ang Bajo de Masinloc at malapit lamang ito sa Zambales. Sa loob ng isa o dalawang araw, napupuno ng huli ang malalaking bangka ng mga mangingisda. Ngayon, anila, may malalaking barkong Tsino sa pasukan ng lugar na humahadlang sa kanila.
Nais ng mga mangingisda na maipaliwanag ang naiulat na mga transaksyon ng Cale88.
Nangako naman si Maniquiz na hihiling siya ng congressional inquiry sa pagbabalik ng sesyon sa Nobyembre upang malaman ang tunay na nangyari at matugunan ang matagal nang hinaing ng mga komunidad.
Umaasa rin ang mga mangingisda na matatalakay ang kanilang sitwasyon sa nakatakdang pag-uusap ni Pangulong Ferdinand “Bongbong” Marcos Jr. at mga kinatawan ng China.
Samantala, sinabi ni Maniquiz na nag-alok ang mga lider ng Kamara ng tulong sa kabuhayan sa pamamagitan ng pagbibigay ng 60 payao o aparatong umaakit ng mga isda upang mapadali ang pangingisda malapit sa baybayin.
