Kalaboso ang dating Sexbomb dancer at dalawang kasamahan nito sa isinagawang buy bust operation sa lungsod ng San Pablo, Laguna noong Martes.
Kinilala ni Laguna Police Provincial Director P/Col. Eleazar Pepito Matta ang naarestong dating miyembro ng dance group na si Sheena Joana Roño Uypico, 34; at ang mga kasamahan nito na sina Melrose Roño Uypico, 32; at Elmer Panaligan Señoreses, 40, pawang mga walang trabaho.
Sinabi ni Matta, ang tatlo ay kabilang sa drug watch list ng Directorate for Intelligence.
Narekober na ebidensya mula sa mga suspek ang anim na heat-sealed transparent plastic sachet ng pinaghihinalaang shabu na nagkakahalaga ng P40,000; P1,000 marked money na ginamit sa buy bust; cellphone; isang kulay asul na Toyota Corolla; at P4,000 pinaghihinalaang pinagbentahan ng shabu.
Ang mga suspek at ebidensya ay dinala sa Provincial Crime Laboratory Office sa Camp Paciano Rizal, Santa Cruz, Laguna, para sumailalim sa drug test, habang inihahanda ang kaukualang kaso laban sa kanila.
