Binigyang diin ng Department of Justice na hindi awtomatikong ‘state witness’ na agad si former Department of Public Works and Highways Engineer Henry Alcantara.
Ito’y kahit pa nagsaoli si Alcantara ng bulto-bultong pera nakamal mula sa maanomalyang flood control projects ng pamahalaan.
Nito lamang kasi ay idinala sa Department of Justice ang mga nakaw na yaman nagkakahalaga ng nasa 110-milyon piso.
Kung kaya’t nilinaw ni Justice Acting Secretary Fredderick Vida na porket nagsaoli na ay nangangahulugan o katumbas na agad para maging ‘state witness’.
Paliwanag niya’y bahagi lamang ang ‘restitution’ o pagsasaoli ng nakaw na yaman sa proseso ng kagawaran para sa mga nasa ‘witness protection program’.
Isa kasi sa mga hinahanap ng Department of Justice ay ang paglalahad ng buong nalalaman ng may katotohanan at lalong lalo na ang pagiging ‘in good faith’ kabilang ang ‘restitution’.
Naniniwala si Justice Acting Secretary Fredderick Vida na ang pagsasaoli ng nakulimbat mula sa mga proyektong dapat sana’y makatutulong ay bahagi aniya para makamit ang katarungan.
Giit niya’y ang ‘restitution’ ay upang marekober pa ng pamahalaan ang mga pondong ninakaw o kinuha ng mga sangkot sa infrastructure scandal.
Dagdag pa ng naturang kalihim, ang pagsasaoli ng pera mula sa nakaw ay isa lamang sa iba pang kondisyon upang mapili bilang ‘state witness’.
Subalit, ipinaalala ni Justice Acting Secretary Vida na mayroon nakaatang na responsibilidad at obligasyon habang testigo ng estado.
Sa kasalukuyan ay wala pa ring napipili ang kagawaran na gagawing ‘state witness’, maging si Henry Alcantara ay provisionally admitted pa lamang sa ‘witness protection program’.
Buhat nito, positibong umaasa ang kampo ng sangkot na dating opisyal na siya’y mapipili pa rin bilang ‘state witness’ sa kaso ng flood control.
