Pinangunahan ni Department of Tourism Secretary Christina Garcia Frasco ang paglulunsad ng Visit Cebu Campaign kahapon,Disyembre 12, sa lungsod ng Lapu-Lapu.
Kasabay nito, nagkaroon ng ceremonial signing ng Memorandum of Understanding na layong pasiglahin ang pagdagsa ng mga turista sa pamamagitan ng airline incentives at espesyal na hotel at resort promotions.
Partikular sa anim na priority markets ang mga bansang may direktang biyahe sa Cebu kabilang ang Korea, Japan, Thailand, Singapore, Hong Kong, at Vietnam.
Sa kanyang talumpati, binigyang-diin ni Sec. Frasco ang mga hakbang ng Department of Tourism upang muling pasiglahin ang tourism activities sa lalawigan at patatagin ang Cebu bilang pangunahing destinasyon para sa leisure, dive, at heritage tourism.
Aniya, ang Visit Cebu Campaign ay magsisilbing malinaw na mensahe na “bukas at handa muli ang Cebu para sa turismo.
Iginiit ng Kalihim na nananatiling buo ang suporta ng kagawaran sa mga tourism stakeholders ng Cebu, lalo na sa pagbangon ng industriya at sa paglikha ng “real and tangible business opportunities” na magpapalakas sa ekonomiya ng probinsya.
“On the part of the Department of Tourism, we are investing by securing the provision of hotel vouchers that will allow tourists to stay longer,to spend more, and to ensure business rise and livelihood rise here in Cebu – not just for establishment but also especially as well for our tourism frontliners,” saad pa ni Frasco.
