Mamamahagi na raw ng personal protective equipment (PPE) ang Department of Health (DOH) sa mga ospital na naubusan na ng supply dahil sa paghawak ng mga pasyenteng positibo sa coronavirus disease (COVID-19).

Ayon kay Health Usec. Maria Rosario Vergeire, kailangan lang magpadala ng mga ospital ng request sa e-mail address na: covid19logistics@gmail.com.

“Pagkatanggap ng requests ay ipo-proseso ng DOH ito at maglalaan ng kinakailangang PPEs para sa requesting hospital. Para sa mga health facilities na malapit (sa DOH), maaari ninyong kunin ang mga PPEs sa DOH compound kung nakakuha na kayo ng abiso (na handa ng kunin ang inyong PPEs). Kung malayo, maaaring ihatid ng DOH sa kanilang ospital o sa pamamagitan ng aming regional office ang tinawag nating DOH Center for Health Development.”

“Maaari rin naman sa malapit na DOH regional office kayo dumulog dahil mayroon na rin tayong ipinamamahagi na mga donasyon. Sa DOH Central office galing ‘to.”

Sa nakalipas na linggo, ilang health workers ang nanawagan ng tulong para madagdagan ang stock ng kanilang PPEs gaya ng face masks at iba pang gamit sa ospital para maiwasan ang pagkahawa nila sa pandemic virus.

Batay sa ulat ng The Medical City, higit 100 health workers nila ang naka-quarantine dahil sa exposure sa COVID-19 patients.

Sa University of Santo Tomas (UST) Hospital naman, 530 staff daw ang pinag-quarantine dahil din sa parehong rason.

“Aalamin natin kung ano ang mga issue at humantong sa ganito ang pangyayari. Papaano ang kanilang infection prevention and control hanggang sa maging malinaw sa atin kung ano ang dapat gawin.”