Tiniyak ni House Speaker Martin Romualdez na patuloy na magta trabaho ang kamara kahit nasa kasagsagan ng congressional break.
Inatasan ni Romualdez ang mga standing at special committee na ipagpatuloy ang kanilang mga pagdinig.
Sa mosyon ni House Deputy Majority Leader Marlyn Agabas sa plenaryo, nais nitong pahintulutan ang lahat ng komite na magtrabaho pa rin sa break mula September 28 hanggang November 5 upang maisulong ang “pieces of legislation”.
Pinatututukan ni Romualdez sa mga komite ang mga makabuluhang panukala partikular na ang mga inaasahang tutugon sa mataas na presyo ng pangunahing bilihin.
Kailangan pa rin aniyang matiyak na mapapabilis ang pagpasa sa nalalabing priority legislations kahit naaprubahan na ang target ng Legislative-Executive Development Advisory Council o LEDAC at mga nabanggit sa State of the Nation Address ng pangulo.
Nasa proseso na ang Kamara ng pag-review sa mga batas na may kinalaman sa foreign direct investments lalo’t ito ang pinakamalaking source ng external financing sa mauunlad na bansa.
Giit pa ng House Speaker, naipakita ang sipag ng mga mambabatas sa pagtupad sa parliamentary duties hindi dahil trabaho nila ito kundi dulot ng pagiging maaasahang katuwang ng Executive Department sa pagsusulong ng mahahalagang polisiya.
