Isiniwalat ni Bureau of Corrections (BuCor) officer-in-charge Gregorio Catapang Jr. na hindi bababa sa P300 milyon ang ibinulsa ng suspendido na hepe ng BuCor na si Gerald Bantag, na sangkot sa hindi natapos na mga proyekto para sa pagtatayo at pagkukumpuni ng mga selda ng kulungan.
Sinabi ni Catapang na ang gobyerno ay naglaan ng badyet na P900 milyon para sa pagtatayo ng mga pasilidad ng bilangguan sa Leyte, Davao, at Palawan bilang bahagi ng mga plano ng decongestion ng BuCor; at isa pang budegt para sa pagsasaayos ng Correctional Institution for Women.
Gayunpaman, sinabi niya na 95% ng pagbabayad para sa mga proyektong ito ay naibigay na, at halos 60% lamang sa mga ito ang natapos.
Dagdag ni Catapang, ang pagkukumpuni at pagtatayo ng mga pasilidad na ito ay nagsimula noong 2020 at dapat na matapos sa Agosto 2022.
Aniya, ang mga dokumento ng proyekto ay “nadodoktor” umano sa utos ni suspended BuCor OIC Bantag para tila tapos na ang mga ito.
Dahil dito, inihayag ni Catapang na magsasampa siya ng mga reklamo ng plunder laban kay Bantag sa pagtatapos ng taon o unang bahagi ng taong 2023. | Bombo Allaiza Eclarinal
