Makakatanggap ng P500,000 ang bawat gold medalist, P300,000 para sa silver, at P100,000 para sa bronze sa katatapos lamang na 3rd Asian Youth Games na ginanap sa Manama, Bahrain mula Oktubre 22 hanggang 31, 2025.
Ang insentibong ito ay alinsunod sa umiiral na batas na nagbibigay ng pabuya sa mga atletang Pilipino na nagwawagi sa mga internasyonal na kompetisyon.
Bukod pa rito, inanunsyo rin ng Philippine Olympic Committee (POC) na makatatanggap ang 24 medalists ng iPhone 17 at karagdagang cash incentives mula sa POC mismo.
Bagama’t hindi pa inilalabas ang eksaktong halaga ng dagdag na pabuya, tiniyak ni POC President Abraham “Bambol” Tolentino na ito ay katumbas ng kalahati ng ibinibigay ng gobyerno sa pamamagitan ng Philippine Sports Commission.
Ang Pilipinas ay nagtala ng kabuuang 26 medalya sa nasabing paligsahan, na kinabibilangan ng mga larong athletics, swimming, boxing, esports, at iba pa.
Ang Asian Youth Games ay isang prestihiyosong multi-sport event para sa mga kabataang atleta sa buong Asya, at ang edisyong ito ay ang unang pagkakataon na muling isinagawa matapos ang 12 taong pagkakansela ng mga nakaraang edisyon noong 2017 at 2021.
Ang pagbibigay ng gantimpala sa mga atletang Pilipino ay nakasaad sa Republic Act No. 10699 o ang “National Athletes and Coaches Benefits and Incentives Act,” na layuning hikayatin ang mas maraming kabataan na pumasok sa larangan ng palakasan at itaguyod ang dangal ng bansa sa pandaigdigang entablado.
