Budget deliberations on track pa rin kahit naka-medical leave si Avisado – Yap

Tiniyak ni House Committee on Appropriations chairman Eric Yap na hindi made-delay ang deliberasyon nila para sa 2022 national budget sa kabila ng medical leave ni Budget Secretary Wendel Avisado.

Ayon kay Yap, itinilaga naman kasi si Usec. Tina Canda bilang Officer-in-Charge habang naka-medical leave ang kalihim.

Bukod dito, matagal na rin sa DBM si Canda kaya natitiyak daw niyang capable naman itong mamuno pansamantala sa kagawaran habang wala si Avisado.

Iginiit ni Yap na isang tawag lang din naman si Avisado kaya naniniwala siyang hindi maantala ang kanilang budget deliberations.

Kamakailan lang, sinabi ng DBM na naka-medical leave si Avisado mula Agosto 2 hanggang 13 kasunod ng laban nito kontra COVID-19.