Pumayag na ang mga opisyal ng Batangay City government na tumayo bilang host sa training ng ilang PBA teams, bilang paghahanda sa pagbubukas ng 46th season ng liga.
Kasunod ito nang pulong nina PBA Commissioner Willie Marcial at Barangay Ginebra team governor Alfrancis Chua kahapon, Mayo 1, kasama sina Batangas City mayor Beverley Dimacuha at Congressman Marvey Mariño.
Inalok ng city government ang Batangas Coliseum at kanilang gym sa Batangas State University bilang practice venues ng ilang PBA teams.
Umaasa si Marcial na aabot sa lima hanggang pitong koponan ng liga ang magte-training sa Batangas City.
Pero nilinaw nito na hindi ilalagay sa ilalim ng isang “bubble” environment ang training ng naturang mga koponan dahil uuwi din naman ang mga ito sa oras na matapos ang kanilang practice sessions.
Sa ngayon, hindi maaring makapag-train sa Metro Manila ang mga PBA ball clubs, dahil pinalawig hanggang Mayo 14 ang modified enhanced community status sa National Capital Region.
