Lumakas pa ang Tropical Cyclone Sinlaku at naging isang severe tropical storm sa labas ng Philippine Area of Responsibility (PAR), ayon sa Philippine Atmospheric, Geophysical and Astronomical Services Administration (PAGASA) nitong Biyernes ng gabi, Abril 10, 2026.
Batay sa weather forecast ng state weather bureau, nasa 2,715 kilometro silangan ng hilagang-silangang Mindanao ang sentro ng bagyo.
Taglay nito ang maximum sustained winds na 95 km/h at pagbugsong aabot sa 115 km/h, habang halos hindi gumagalaw ang direksyon nito.
Ayon sa weather bureau, inaasahang papasok ang Sinlaku sa PAR sa susunod na linggo at bibigyan ito ng local name na “Caloy.”
Gayunpaman, sinabi ng PAGASA na hindi inaasahang direktang makakaapekto ang bagyo sa kondisyon ng panahon sa bansa dahil inaasahang lilihis ito at magtutungo sa mas mataas na latitude habang patuloy na lumalayo sa Pilipinas.
