Pinasinayaan ng Pamahalaang Lungsod ng Las Piñas sa pangunguna nina Mayor Imelda Aguilar at Vice Mayor April Aguilar ang bagong 11 na funeral chapels sa loob ng Public Crematorium and Columbarium sa Barangay Ilaya nitong Huwebes, January 25.
Ayon kay Mayor Aguilar, ang inagurasyon sa mga bagong funeral chapel ay pagpapalawak ng mahahalagang serbisyo ng lokal na pamahalaan para sa mga residente lalo na sa mga nangangailangan at kapus sa buhay.
Dagdag pa ng alkalde na ang columbarium ng Las Pinas ay may kabuuang 3,500 na niches o nitso na kayang i-accommodate ang 14,000 na urns.
Binigyang-diin pa ni Mayor Aguilar na ang mga bagong bukas na chapel ay ginawang “friendly” sa persons with disabilities (PWDs) sa pamamagitan ng paglalagay ng ramp o rampa sa likod ng columbarium ng lungsod para sa mas madaling access sa panahon ng burol o pagbisita sa kanilang namayapang mahal sa buhay o kamag-anak.
Ang columbarium ng Las Piñas sa kasalukuyan ay nakapag-cremate na ng kabuuang 1,200 na mga labi sa pamamagitan ng dalawang makina na kayang magsunog ng apat na labi kada araw.
Sa kasagsagan ng pagpapasinaya, nagbigay-pugay ang alkalde at inalala nito ang yumaong asawa na si dating Mayor Vergel “Nene” Aguilar na naglunsad ng “Libreng Libing” project para maibsan ang pasaning pinansiyal ng mga maralitang residente ng lungsod.
Idinagdag pa ni Aguilar na ang “libreng Libing” program ay kabilang sa paggamit ng libreng isa sa 11 na bagong gawang chapel sa columbarium sa loob ng tatlong araw at dalawang gabi na pananatili para sa burol ng kanilang namayapang mahal sa buhay.
