Pinuri ng Armed Forces of the Philippines (AFP) ang pormal na deklarasyon ng Association of General and Flag Officers (AGFO) na tahasang tumutuligsa sa mga panawagang destabilization at nagpapahayag ng buong tiwala at suporta sa kasalukuyang liderato ng militar.
Sa isang pahayag, sinabi ng AFP na lubos nitong pinahahalagahan ang “Manifesto of Unwavering Support and Solidarity” ng AGFO.
Ayon sa pahayag, ang ipinakitang tiwala ng mga opisyal na inialay ang malaking bahagi ng kanilang buhay sa paglilingkod ay nagpapatibay sa pinagsasaluhang paninindigan ng mga aktibo at retiradong opisyal na panatilihin ang paggalang sa Konstitusyon, sibilyang pamumuno, at propesyonalismo ng institusyong militar.
Tinawag ng AFP ang mensahe ng AGFO na makapangyarihang paalala na ang pagkakaisa ng mga dating at kasalukuyang miyembro ng militar ay isa sa pinakamalalakas na sandigan ng organisasyon.
Binigyang-diin din ng AFP na ang pagiging non-partisan at pagsuway sa anumang destabilization efforts ay nagpapatatag sa mga prinsipyong gumagabay sa bawat sundalo.
Binubuo ang AGFO ng mga retirado at aktibong heneral at flag officer mula sa AFP, Philippine National Police, Philippine Coast Guard, Bureau of Jail Management and Penology, at Bureau of Fire Protection.
Ayon sa grupo, naglabas sila ng manifesto kasunod ng umano’y “political noise at mga panawagang mula sa ilang sektor” na hinihikayat ang AFP na bawiin ang suporta kay Pangulong Ferdinand Marcos Jr na siyang commander-in-chief.
Mariing kinokondena ng AFP ang anumang panawagan para sa AFP na makilahok sa mga “unconstitutional acts o military adventurism.”
Binigyang-diin ng AGFO ang Article XVI, Section 5 ng Konstitusyon na nagtatakdang dapat manatiling hindi bahagi ng partisan politics ang Armed Forces at ipinagbabawal sa mga miyembro nito ang paglahok sa anumang gawaing politikal, maliban sa pagboto.
Nagpahayag din ang grupo ng buong tiwala sa liderato ng AFP at pinuri ang organisasyon sa matatag nitong pagtutol sa partisan interests at sa pagpapanatili ng pagkakaisa, propesyonalismo, at katapatan sa Konstitusyon.
Idinagdag pa ng AGFO na ang kabanalan ng Konstitusyon at ang prinsipyo ng civilian supremacy over the military ang pundasyon ng demokrasya sa bansa mga prinsipyong kanilang ipinangakong poprotektahan sa aktibong serbisyo at maging sa kanilang pagreretiro.
