Posibleng magpatupad ng adjustment sa 2023 proposed national budget ang Kamara para mailaan sa rehabilitasyon bunsod ng iniwang pinsala ng Bagyong Paeng.
Ayon kay House Speaker Martin Romualdez, kailangan ang comprehensive assessment sa pinsala at lawak ng bagyong Paeng sa ibat-ibang bahagi ng bansa.
Sinabi ni Speaker makatutulong ito kung kakailanganin ng Kongreso na i-adjust ang 5.268-trillion peso national budget para sa susunod na taon at mailaan sa pangangailangan ng mga nasalanta ng bagyo.
Siniguro ni Romualdez na gagawin lahat ng Kongreso para matulungan na makabangon muli ang mga kababayan natin mula sa panibagong hamon.
Ayon kay Romualdez, inatasan niya si Congressman Rizaldy Co, Chairman ng House Committee on Appropriations na kunin ang damage assessment report mula sa mga Kongresista para marepaso ang posibleng adjustment sa 2023 proposed national budget.
Ang adjustment anya ay para sa repair and rehabilitation ng mga naapektuhang lalawigan para mailaan sa budget sa susunod na taon.
Naipasa na ng Kamara ang 2023 General Appropriations Bill at tatalakayin na ito ng Senado sa sandaling mag-resume ang sesyon sa November 7 bago sumalang sa bicameral conference committee.
Samantala, naglunsad din ng relief drive ang Kamara para sa mga nasalanta ng bagyong Paeng.
Bukod sa pledges o tulong pinansiyal na umaabot na sa 35-million pesos, may mga donasyon din na relief goods ang Kamara na nakatakdang dalhin sa mga lalawigan na malubhang nasalanta ng bagyong Paeng.
