Iginiit ng House prosecution na kailangan pa ring maipaliwanag ni Vice President Sara Duterte ang umano’y P463.04-milyong yaman kahit alisin sa kuwenta ang mga asset ng mga kumpanyang iniuugnay sa kaniya at sa asawang si Atty. Manases “Mans” Carpio.
Ayon kay House prosecution spokesperson at Rep. Zia Alonto Adiong, ang halaga ay bahagi ng P817.87-milyong tantiya ng forensic accounting expert na si ATTY Alexander Cabrera sa umano’y hindi idineklarang asset at hindi maipaliwanag na yaman ng mag-asawa mula 2022 hanggang 2025.
Kabilang sa sinuri ni Cabrera ang mga bank deposit, ari-arian, posibleng hindi idineklarang kita at interes sa mga kumpanyang Metro City Chow Foods Corp., Gencorp Industries Inc. at Cale88 Foods Corp. Kinuwestiyon naman ng depensa kung dapat isama sa personal na yaman ng mag-asawa ang mga asset at transaksiyon ng mga kumpanyang ito.
Ayon sa prosecution, may mga deposito rin umanong hindi nakatala sa Statement of Assets, Liabilities and Net Worth o SALN ni Duterte, gayundin ang mga pagkakaiba sa kaniyang idineklarang kita at iba pang rekord pinansyal. Gayunman, alegasyon pa lamang ang P463-milyong halaga at hindi pa ito pinal na napatutunayan ng Senate impeachment court. Itinanggi ni Duterte ang anumang pagkakamali, habang kinuwestiyon ng kaniyang mga abogado ang ebidensiya ng prosecution.
Article II, na tumatalakay sa umano’y hindi maipaliwanag na yaman, na lamang ang natitira sa impeachment case matapos bawiin ng House prosecution ang tatlo pang kaso. Inaasahang sisimulan ng depensa ang paglalahad ng ebidensiya sa muling pagdinig sa Nobyembre 9.
