Ipina-deport na ng Bureau of Immigration (BI) ang 75 Chinese nationals na naaresto walong buwan na ang nakaraan matapos masangkot sa sa illegal online gaming operations dito sa bansa.
Ayon kay Immigration Commissioner Jaime Morente, ang mga Chinese nationals ay umalis na lulan ng chartertered flight mula Ninoy Aquino International Airport (NAIA) patungong Zhengzhou, China.
Sinabi ni Morente na ang Chinese embassy mismo ang umasikaso sa pagpapauwi sa mga illegal aliens na naaresto noong Disyembre 2019 pero na-delay ang kanilang deportation dahil sa Coronavirus disease 2019 (COVID-19) pandemic.
Ang nga pina-deport ay inilagay na raw sa immigration blacklist para hindi na makabalik pa dito sa Pilipinas.
“They were expelled pursuant to a summary deportation order issued against them by our Board of Commissioners for violating our immigration laws and being undesirable aliens,” ani Morente.
Sinabi naman ni BI Intelligence Chief Fortunato Manahan Jr., ang 75 na idineport ay bahagi ng 300 Chinese nationals na naaresto ng pinagsanib puwersang BI Intelligence Division at Quezon City Police District sa kanilang nirerentahang gusali sa North EDSA sa Bago Bantay, Quezon City.
Dagdag ni Manahan nilabag ng mga Chinese nationals ang kodisyon ng kanilang pananatili sa bansa bilang tourists at pagtatrabaho na walang kaukulang permit.
Sangkot ang mga ito sa hindi otorisadong online gaming operations.
“Chinese authorities said that they were engaged in cyber crime activities and investment scams that victimized many of their compatriots in China,” ani Manahan.
Lumalabas na ang lahat ng mga idineport ay kanselado ang pasaporte ng Chinese government.
