Hindi pa rin nakikilala ng mga otoridad ang tatlong bangkay ng mga terorista na kabilang sa anim na napatay ng mga tropa ng pamahalaan sa nangyaring engkwentro sa Patikul, Sulu.
Una rito, ang tatlong mga bangkay ang narekober ng mga tauhan ng 32nd Infantry Battalion matapos ang engkwento sa mga local terrorist group sa Barangay Taong, Patikul, Sulu kahapon ng umaga.
Sa naturang labanan, minalas namang masawi ang tatlong mga sundalo.
Gayunman hindi pa rin isinasapubliko ang pangalan ng tatlong mga casualties at tatlo pang sugatan na mga sundalo habang ipinapaalam pa ang mga ito sa kanilang mga kaanak.
Samantala labis namang ikinalungkot ni Maj. Gen. Corleto Vinluan, ang Joint Task Force Sulu commander, ang pagkamatay ng kanyang mga tauhan.
“It is with deep sadness to report that three of our brave soldiers succumbed to death while defending the people of Sulu,” ani Maj. Gen. Vinluan. “We seek for prayers for the eternal repose of their souls and for the speedy recovery of the wounded soldiers.”
Habang nagbigay pugay din naman si WestMinCom commander Lt. Gen. Cirilito Sobejana sa tatlong mga nasawi na tinawag niyang “fallen heroes.”
“The men and women of WestMinCom commiserates with the bereaved families of our fallen heroes who dedicated their life serving their beloved country,” bahagi pa ng statement ni Sobejana. “Our forces from the JTF Sulu are determined to pursue the fleeing enemies in honor of their fallen comrades.”
