Inaresto ng pulisya ang tatlong lalaking nakasuot ng balaclava o takip sa mukha at may suot na vest na may markang “PRESS” habang nagaganap ang protesta sa Maynila nitong Linggo, Nobiyembre 30 kasabay ng Trillion Peso March rally.
Ayon sa inisyal na ulat ng pulisya, napansin ang tatlong indibidwal bandang umaga malapit sa Plaza Salamanca sa Kalaw Avenue. Nilapitan sila ng mga awtoridad matapos mapansing nakasuot sila ng takip sa mukha na ipinagbabawal sa ilalim ng bagong ordinansa ng Lungsod ng Maynila.
Dinala ang tatlo sa presinto para itanong at beripikahin ang kanilang pagkakakilanlan.
Ayon sa kanila, sila umano ay contributors ng KS21 page, na iniuugnay sa grupong “Kilusang Setyembre bente uno.” Inilarawan nila ang grupo bilang isang freelance media outfit na suportado ng isang hindi pinangalanang non-government organization (NGO).
Batay naman sa page ng Kilusang Setyembre Bente Uno, ang grupo ay isang youth coalition at NGO na nagtataguyod ng mga adbokasiyang pro-accountability, anti-corruption at pro-Philippines.
Kaugnay nito, patuloy na bineberipika ng mga awtoridad ang tunay na pagkakakilanlan ng tatlo at ang kanilang diumano’y koneksyon sa sinasabing media group.
