Tatapusin na umano ng Task Force Philhealth sa unang bahagi ng susunod na linggo ang kanilang imbestigasyon sa katiwalian sa ahensiya na kinasasangkutan ng mga matataas na opisyal at mga empleyado nito.
Sa panayam ng Bombo Radyo Philippines kay Department of Justice Usec. at Spokesman Markk Perete, sinabi nitong isang pagdinig na lamang ang kanilang isasagawa na kinabibilangan ng 12 boluntaryo umanong dumulog sa DoJ para isiwalat ang mga nalalamang katiwalian sa Philhealth.
Pagkatapos nito ay gagawa na sila ng report at recommendation sa Pangulong Rodrigo Duterte kaugnay ng katiwalian sa ahensiya.
Una nang sinabi ni Justice Sec. Menardo Guevarra na pagkatapos ang imbestigasyon ay pag-iisahin at iaanalisa na raw nila ang mga impormasyon at ebidensiya na kanilang nakalap.
Sa ngayon ang mga participating agencies gaya ng National Bureau of Investigation (NBI), Presidential Anti Corruption Commission (PACC), Anti Money Laundering Council (AMLC) at Commission on Audit (COA) na nag-iimbestiga rin sa kaso ay susubukan daw na tapusin na rin ang kanilang kasalukuyang imbestigasyon o special audits.
Habang ang Ombudsman at Civil Service Commission (CSC) ay susubukan namang resolbahin ang philhealth cases na nakabinbin sa kanilang mga opisina.
Dagdag ni Guevarra, ang deadline ng submission ng kanilang report ay sa Setyembre 14 na pero ang kanilang composite teams ay magpapatuloy sa kanilang imbestigasyon para sa mga mas kumplikadong philhealth cases ng graft o fraud.
Pagkatapos nito ay magsasampa na rin sila ng kaukulang legal action.
“We’ll wind up our hearings next week, thereafter analyze and consolidate all the information and evidence that we have gathered, and proceed to prepare our report with recommendations to the president. meantime, participating agencies, such as the NBI, PACC, AMLC, and COA will try to conclude some of their ongoing investigations or special audits, while the OMB and the CSC will exert efforts to resolve philhealth cases already pending with their offices. our deadline for the submission of the report is on 14 sept 2020, but our composite teams will continue with their investigation of the more complicated philhealth cases of graft or fraud and file the appropriate legal action even beyond that termination date,” ani Guevarra.
