Inanunsyo ni Bureau of Internal Revenue (BIR) Commissioner Charlito Martin R. Mendoza na inihahanda na ng ahensya ang patakaran para alisin ang Value-Added Tax (VAT) sa allowable system loss charge sa mga bill sa kuryente, alinsunod sa direktiba ni Pangulong Ferdinand R. Marcos Jr. na magbigay ng agarang ginhawa sa mga mamamayan.
Ilalabas ng BIR ang kaukulang Revenue Memorandum Circular pagkalipas ng 15 araw mula sa pagkakaimprenta ng Energy Regulatory Commission (ERC) Resolution No. 26, Series of 2026, kung saan pormal na inuri ang system loss charge bilang isang government-mandated pass-through cost.
Hindi dapat nagbabayad ng VAT ang mga konsyumer sa kuryenteng hindi naman nakararating sa kanilang mga tahanan o negosyo, ayon kay Mendoza. Ang pass-through charge ay halagang kinokolekta at ipinapasa lamang sa tamang rekapitan, kaya ang pagtatanggal ng VAT dito ay nangangahulugang mas mababang singil ang ipapasa sa mga tao.
Sa ilalim ng ERC Resolution No. 26, Series of 2026, ang allowable system loss ay itinuturing na nabawing gastos at hindi bilang kumikitang kita para sa mga generation company, National Grid Corporation of the Philippines (NGCP), at mga distribution utility.
Binigyang-diin ni Mendoza na ang hakbang na ito ay naaayon sa patnubay ni Finance Secretary Frederick Go na magpatupad ng mga repormang ramdam agad ng publiko. Ang nalalapit na patakaran ay kasunod ng RMC No. 60-2026 na inilabas noong Hunyo, kung saan inalisan din ng output VAT at creditable withholding taxes ang iba pang mandated charges tulad ng Lifeline Subsidy at Green Energy Auction Allowance.
