SHANGHAI – Patuloy ang imbestigasyon ng mga otoridad sa China matapos ang nangyaring pananaksak ng isang hindi pa tukoy na indibidwal sa Hong Kong actor na si Simon Yam.
Una rito, batay sa ulat ng Chinese state media, pinagsasaksak si Yam gamit ang kutsilyo sa kalagitnaan ng isang promotional event sa lungsod ng Zhongsan, lalawigan ng Guangdong, China.
Dinala na raw ang aktor sa ospital para malapatan ng lunas at sinabi ng mga medical personnel na hindi naman daw life threatening ang natamo nitong injury sa kanyang kamay at tiyan.
Base naman sa pahayag ng pulisya, maaaring biktima lamang daw si Yam ng mistaken identity.
Umani ng papuri at pagkilala ang 64-year-actor sa naging papel nito sa Hong Kong crime film na Contact noong 1992.
Naging tanyag din si Yam sa kanyang karakter sa Lara Croft Tomb Raider: The Cradle of Life noong 2003. (Reuters)
