Ibinasura ng Supreme Court en banc ang indirect contempt petition na inihain laban kay Sen. Vicente “Tito” Sotto III kaugnay ng kaniyang mga kritisismo sa desisyon ng korte sa impeachment case ni Vice President Sara Duterte.
Sa desisyong isinulat ni Senior Associate Justice Marvic Leonen, binigyang-diin ng mataas na hukuman na ang mga pahayag ni Sotto ay bahagi ng pampublikong diskurso sa usaping pambansa at pinoprotektahan bilang political speech.
Inakusahan ng mga petisyoner sa pamumuno ni Atty. Manuelito Luna ang senador ng pagpapasama sa tiwala ng publiko sa hudikatura matapos nitong kuwestiyunin ang naging desisyon at ang pang-unawa ng ponente sa mga alituntunin ng Kongreso.
Nilinaw naman ng korte na ang mga batikos sa mga desisyon ng hukuman ay hindi awtomatikong pinarurusahan kahit pa ito ay maituturing na masakit, nakasasakit, o diumano’y mali.
Nagbabala pa ang tribunal na ang pagparusa sa senador sa simpleng pagpapahayag ng hindi pagsang-ayon ay magiging isang labis na paglimita sa kalayaan sa pagpapahayag ng mamamayan.
Muling nanawagan ang Supreme Court para sa kapwa paggalang sa pagitan ng mga sangay ng pamahalaan habang pinapanatiling bukas ang hudikatura sa mga makabuluhang batikos mula sa publiko.
