Nakapagtala ng panibagong record na P60 kada US dollar ang halaga ng piso ngayong araw, ang pinakamahina nitong antas sa kasaysayan.
Nairehistro ang intraday low na P60.4 at average na P60.161 matapos magsimula sa P59.9 ang opening rate.
Gayunman, hindi pa ito ang closing record para sa araw ng Huwebes.
Ayon sa mga analyst, dulot ito ng patuloy na pagtaas ng presyo ng langis sa pandaigdigang merkado at ng tensyon sa Gitnang Silangan.
Naging mas malakas din ang dolyar dahil sa paglipat ng mga investor sa safe-haven assets.
Nagpahayag ang Bangko Sentral ng Pilipinas (BSP) na patuloy nitong binabantayan ang sitwasyon at handang mag-intervene kung kinakailangan.
Babala ng ekonomistang si Prof. Emmanuel Leyco sa panayam ng Bombo Radyo, ang mahinang piso ay magtutulak ng mas mataas na presyo ng mga inaangkat na produkto, lalo na ang petrolyo.
Dahil dito, inaasahang tataas pa ang inflation kung magpapatuloy ang pagbaba ng piso laban sa dolyar.
