Matagumpay umanong na naitaboy ng Philippine Coast Guard (PCG) ang mga barko ng Chinese maritime militia sa Sabina Shoal noong Abril 27 at 29 na sakop pa ng Philippine Exclusive Economic Zone (EEZ).
Sa ulat ng National Task Force for the West Philippine Sea (NTF-WPS), nagtungo noong Abril 27 ang BRP Cabra ng Philippine Coast Guard kasama ang dalawang barko ng BFAR na MCS 3002 and 3004 sa Sabina Shoal na may 130 milya ang layo sa kanluran ng Palawan para magsagawa ng law enforcement operations.
Naabutan nila dito ang pitong mga barko ng China na nakahanay sa isang linya. Dito na nag-isyu ng challenge ang BRP Cabra sa mga dayuhang barko.
Makalipas ang 20 minuto ay nag-disperse naman ang mga barko ng China at umalis sa lugar.
Makalipas ang dalawang araw, bumalik uli sa lugar ang BRP Cabra at naabutan ang lima namang barko ng Chinese maritime militia.
Agad ding umalis ang mga barko ng China sa pagdating ng barko ng Philippine Coast Guard.
Sinabi ni National Security Adviser at NTF-WPS chairperson Sec. Hermogenes Esperon, ipagpapatuloy ng PCG at BFAR ang mga maritime patrols sa Exclusive Economic Zone ng bansa sa West Philippine Sea para itaguyod ang soberenya ng Pilipinas sa karagatan.
