Pinaalalahanan ni Pangulong Ferdinand Marcos Jr. ang sambayanang Pilipino na isabuhay ang tapang, nasyonalismo, at matatag na paninindigan ni Gat Andres Bonifacio laban sa kawalang katarungan, kasabay ng pagdiriwang ngayong araw ng ika-162 anibersaryo ng kapanganakan ng rebolusyonaryong bayani.
Ngayong araw ipinagdiriwang ang ika-162 Anibersaryo ng Pagsilang ni Gat Andres Bonifacio isa sa mga dakilang bayani ng ating kasaysayan na nagpaalab sa ating nagkakaisang damdamin, at nagmulat sa ating mga mata upang labanan ang pang-aapi sa mga Pilipino.
Hinikayat ng Pangulo ang publiko na pangalagaan ang dangal at gampanan ang tungkuling mahalin at paglingkuran ang bayan, tulad ng ipinamalas na pagmamahal ni Bonifacio sa Inang Bayan.
“Tulad ni Gat Andres, pangalagaan natin ang ating dangal at manatiling puspos ng kadakilaan sa mga gawaing para sa ikabubuti ng lahat.
Buong-lugod nating isapuso ang tungkuling wala nang hihigit pa sa pag-ibig sa ating Inang Bayan,” dagdag ni Pangulong Marcos.
Sa paggunita sa mga adhikaing iniwan ng Supremo, binigyang-diin ng Pangulo na nananatiling makabuluhan ang tapang at paninindigan ni Bonifacio sa harap ng mga hamon ng makabagong panahon.
Aniya, paalala ito ng responsibilidad ng bawat Pilipino na pangalagaan ang mga kalayaang pinaghirapan noon.
Bagaman mahigit isang siglo na ang lumipas, patuloy umanong nagbibigay-inspirasyon ang mga prinsipyong iniwan ni Bonifacio at nag-aalab sa determinasyon ng bansa na protektahan ang kasarinlang ipinaglaban ng mga rebolusyonaryo.
Binigyang-pugay rin ng Pangulo ang personal na paglalakbay ni Bonifacio na humubog sa kanyang adhikain para sa isang makatarungan at pantay-pantay na lipunan.
Dahil sa lumalalang kalagayan ng bansa noong panahon ng kolonyal na Espanya, itinatag ni Bonifacio ang Kataas-taasang, Kagalang-galangang Katipunan ng mga Anak ng Bayan (KKK), na naging gabay ng sambayanan tungo sa pagkamit ng kalayaan.
Sa pagtatapos ng kanyang mensahe, sinabi ng Pangulo na nawa’y maging tanglaw ang mga aral ni “Maypagasa” ang codename ni Bonifacio sa Katipunan sa hangarin ng bansa tungo sa isang payapa, malaya, at maunlad na Bagong Pilipinas.
