Nanindigan si House Ways and Means Committee Chairman Joey Salceda na maganda para sa bansa ang pagkakaroon ng Rice Tariffication Law (RTL)
Ito ay kahit pa aniya nagsulputan kamakailan ang mga structural anomalies sa naturang batas kasunod nang pagbaba ng farmgate price ng palay dahil sa manipulasyon ng mga rice cartel.
Bagama’t aminado si Salceda na isa sa mga “unintended consequence” ng RTL ang paglakas ng bargaining position ng mga rice traders, iginiit naman nito na hindi naman agad dapat ibasura ang batas.
Kaya nananawagan ang kongresista sa Department of Justice at Department of Trade and Industry (DTI), katuwang ang iba pang ahensya gaya ng Philippine Competition Commission, na i-tokhang o panagutin ang mga rice trades na nagsasamantala sa RTL.
Maaari aniyang habulin ang mga ito at kasuhan ng economic sabotage, profiteering at price manipulation.
Ayon kay Salceda, maaring igiit ng DTI ang Executive Order No. 913 na nagbibigay sa ahensya ng adjudicatory powers para maprotekahan ang mga consumers laban sa mga abusadong traders.
