Tinatayang aabot sa 361,699 na examinees ang inaasahang kukuha ng Career Service Examination-Pen and Paper Test (CSE-PPT) bukas Marso, 3,2024.
Ito ay magmumula sa 16 na CSC testing centers sa buong bansa bukas.
Kaugnay nito ay pinayuhan ni CSC Chairperson Karlo Nograles ang mga kukuha ng exam na ngayon palang ay alamin na nila ang kanilang school assignment.
Dapat din aniyang matukoy na nila ang mga reminders para sa gaganaping pagsusulit.
Sinabi pa ni Nograles na maaari nilang buksan ang Examination Advisory No. 4, s. 2024, at ito ay makikita sa website ng CSC.
Kailangan rin aniya na magtungo sa mga testing venue ng mas maaga at hindi lalagpas sa alas-6:30 ng umaga.
Nakatakda kasing isara sa mga examinees ang mga gate ng testing venue pagsapit ng alas-7:45 ng umaga, at hindi na papayagang kumuha ng exam ang mga late na dumating.
Higit pa rito, mahigpit na ipatutupad sa pagsusulit ang “No ID, No Exam” policy.
Mahigpit ding ipinagbabawal ang paglabas ng test booklet sa labas ng testing room at pagdadala ng electronic device tulad ng mga cellular phone, smartwatches, o iba pang gadget. (With reports from Bombo Victor Llantino)
