Nanawagan na rin ang lawyers/commuters group kay Presidente Ferdinand Marcos Jr. na sumailalim sa drug test dahil ito umano ang ‘driver ng pamahalaan.’
Sa eksklusibong panayam ng Star FM Cebu kay Atty. Ariel Inton, founder ng Lawyers for Commuters Safety and Protection, iginiit nito na na kung ang mga drayber ng pampublikong sasakyan ay required na sumailalim sa drug testing para sa kaligtasan ng mga pasahero, nararapat lamang aniya na ipakita rin ng Pangulo ang parehong antas ng pananagutan.
Ayon kay Atty. Inton, layunin nito na masiguro hindi lamang ang kaligtasan kundi pati ang tamang direksyon ng pamahalaan. Aniya, kapag ang isang drayber ay adik, hindi pa umano ito mapagkakatiwalaan — ganun din umano sa panunungkulan ng opisyal, lalo na kung may batayan.
“Kapag nagpositibo ang drayber ay kaagad suspendido ang lisensya at nanganganib na suspindihin din ang prangkisa ng sasakyan.
At ayon din sa direktiba ni Presidente ay istriktong ipinatutupad ito para masigurong ligtas ang byahe ng mga pasahero,” wika ni Inton.
Ipinaliwanag niya na kung naniniwala ang Pangulo na kailangang magpadrugtest ang mga drayber, bakit hindi naman umano ito i-apply sa kanya.
Sinang-ayunan din niya ang pahayag ng iba na maaaring walang batayan ito sa batas, ngunit ayon sa kanya, kung ayaw ng mamamayan na drayber ay adik, ayaw din umano nila ng opisyal na adik.
Paglilinaw pa ng abogado na hindi niya inihalintulad ang drug test sa mga drayber at sa Pangulo; ang punto lamang, kung ito ay direktiba ng Pangulo at ipinatupad ng DOTr, ibig sabihin ay naniniwala siyang kinakailangan ang drug test para sa kaligtasan ng pasahero.
Kinwestiyon pa niya, kung ganun ang hinihingi sa drayber, bakit hindi ganun ang pananaw ng Pangulo para sa kanyang sarili.
“Kung ang mga public transport drivers ay sumasailalim sa periodic drug test para masigurong ligtas ang mga pasahero hindi kaya dapat na rin mag drug test ang Presidente para masiguro natin na ang nagmamaneho ng pamahalaan ay hindi adik? ” , dagdag nito.
