Isinusulong ni Senate President Pro Tempore Ping Lacson ang paglalaan ng pondo para sa rehabilitasyon ng mga lokal na pamahalaang labis na napinsala ng magkasunod na bagyong Tino at Uwan, sa pamamagitan ng paghingi ng aktuwal na disaster assessment reports mula sa Office of Civil Defense (OCD).
Sa kanyang interpellation para sa panukalang 2026 budget ng Department of National Defense, humiling si Lacson ng kopya ng Post Disaster Needs Assessment (PDNA) at Rapid Damage Needs Assessment (RDANA) bilang gabay sa paggawa ng kinakailangang mga amyenda sa budget bill.
Ang kahilingan ay kasunod ng pormal na apela ng Malacañang, sa pamamagitan ni Executive Secretary Ralph Recto, na maglaan ng pondo para tulungan ang mga LGU sa kanilang rehabilitasyon.
Binigyang-diin ni Lacson na hindi maaaring gumawa ng amyenda ang Senado at Kongreso nang walang datos mula sa aktuwal na pinsala.
Layunin din niyang maiwasan ang lump-sum appropriations, lalo na kung magkakaroon ng realignment ng pondo patungo sa Local Government Support Fund (LGSF) upang magamit ito ng mga LGU para sa kanilang pagbangon.
Ayon kay Senate finance committee chairman Sherwin Gatchalian, nakatakdang magsumite ang OCD ng mga hinihinging ulat, posibleng sa Disyembre 1.
Nais ni Lacson na direktang isumite ang mga dokumento sa Senate finance committee bilang gabay sa bicameral conference committee.
Nagbabala si Lacson na kung hindi maibigay ang mga ulat, maaaring mapilitan ang Kongreso na magpasa ng supplemental budget—bagama’t nangangailangan ito ng sertipikasyon mula sa Treasury na may sapat na pondo.
Dagdag din ni Lacson, dapat isaalang-alang ang calamity funds ng mga LGU, na katumbas ng limang porsyento ng kanilang kabuuang lokal na budget. Halimbawa, ang Cebu na may P23-bilyong budget para sa 2024 ay malamang may P1.15 bilyon sa calamity fund. Ang Negros Occidental naman, na may P5.4-bilyong budget para sa 2024, ay maaaring may humigit-kumulang P270 milyon sa calamity fund.
