Nagbanta ang Iran ng “mahaba at masakit na ganting-atake” laban sa Estados Unidos sakaling muling magsagawa ng military strikes ang Washington, habang patuloy ang tensyon sa gitna ng nagpapatuloy na sigalot.
Dalawang buwan na mula nang magsimula ang digmaan na kinasangkutan ng U.S. at Israel laban sa Iran, nananatiling sarado ang Strait of Hormuz, isang mahalagang ruta na dinadaanan ng halos 20% ng global oil at gas supply. Dahil dito, nagkaroon ng pagtaas at pabago-bagong galaw sa presyo ng langis sa pandaigdigang merkado.
Bagama’t may umiiral na ceasefire mula Abril 8, hindi pa rin nagkakasundo ang mga panig, lalo na’t patuloy na hinaharang ng Iran ang nasabing strait bilang tugon sa naval blockade ng U.S. sa kanilang oil exports.
Samantala, inaasahang bibigyan ng briefing si US President Donald Trump hinggil sa posibleng panibagong serye ng military strikes laban sa Iran, na layong pilitin itong maging mas bukas sa negosasyon kaugnay ng nuclear issues.
Dahil sa mga pangyayaring ito, pumalo ang presyo ng Brent crude oil sa mahigit $126 kada bariles bago bahagyang bumaba sa paligid ng $113, na nagpapakita ng matinding epekto ng geopolitical tensions sa global economy. (report by Bombo Jai)
