Nagpaabot ng pakikiramay si dating House Speaker at Leyte Rep. Ferdinand Martin Romualdez sa pagpanaw ni dating House Speaker Jose de Venecia Jr., na tinawag niyang isa sa pinakamatibay na haligi ng demokrasya sa Pilipinas at “amang pampolitika” ng partidong Lakas-CMD.
Pumanaw si De Venecia, mas kilala bilang “Speaker Joe,” noong Pebrero 10, 2026, sa edad na 89.
Sa kanyang pahayag, binigyang-diin ni Romualdez ang mahalagang papel ni De Venecia sa pagbuo ng Lakas-NUCD at ang kanyang kontribusyon sa pagkakaisa ng bansa sa pamamagitan ng kanyang tanyag na “Rainbow Coalition.”
“Si Speaker Joe ay higit pa sa isang lingkod-bayan; siya ay isang tunay na estadista. Taglay niya ang pambihirang talino na makita ang hinaharap at ang karunungan na pagsama-samahin ang lahat,” ani Romualdez.
Ilan sa mga pamanang binanggit ni Romualdez ay ang mga sumusunod:
Workshop ng Reporma: Sa ilalim ng pamumuno ni De Venecia, naging sentro ng mahahalagang batas at konsensus ang Kamara.
Interfaith Dialogue: Kinilala rin ang kanyang papel sa pandaigdigang entablado sa pagsusulong ng kapayapaan at dayalogo sa pagitan ng iba’t ibang relihiyon.
Mentorship: Bilang personal na mentor, pinasalamatan ni Romualdez ang dating Speaker sa gabay at inspirasyong ibinigay nito sa maraming mambabatas.
Nagpaabot din ng pakikiramay si Romualdez sa pamilya ng pumanaw na dating Speaker, partikular sa asawa nitong si Rep. Gina de Venecia at anak na si dating Rep. Christopher de Venecia.
“Speaker Joe, mananatili kang puso ng Lakas-CMD. Ang iyong pamana ay mabubuhay sa bawat lingkod-bayang nangangahas na mamuno nang may pananaw at pagmamahal sa bayan,” pagtatapos ni Romualdez.
