Nagpasalamat ang Department of the Interior and Local Government (DILG) sa mapayapang pagdaraos ng mga protesta sa Metro Manila nitong Linggo, Nobyembre 30, kasabay ng paggunita sa Bonifacio Day.
Tinawag ni Interior Secretary Jonvic Remulla na “generally peaceful” ang mga kilos-protesta, kabilang ang Trillion Peso March sa People Power Monument sa Quezon City at iba pang pagtitipon sa Rizal Park at Recto Avenue sa Maynila.
Libo-libong demonstrador ang nanawagan ng pananagutan sa umano’y katiwalian sa flood control projects.
Personal na tumungo si Remulla sa Recto upang samahan ang mga pulis at nagbigay ng mensahe ng “peace to all mankind.” Pinabulaanan din niya ang umano’y “overkill” sa seguridad, partikular sa Mendiola, at iginiit na nagkakaroon lamang ng overreaction kung nagkakasakitan ang mga nagpoprotesta.
Sa kabila ng mga panawagan laban sa administrasyon, nagpasalamat ang DILG sa maayos at mapayapang paglahok ng publiko. Tiniyak din ni Remulla na tututukan ng kagawaran ang mga alegasyon ng katiwalian.
“Umaasa po kayo na ang ating kagawaran ay patuloy na nagmamasid hanggang sa matapos po ang lahat ng ito,” ayon sa pahayag ng DILG.
Ayon sa organizers, umabot sa 30,000 hanggang 55,000 ang dumalo sa mga rally, habang nasa 5,000 naman ang bilang mula sa drone footage na tinaya ng pulisya.
